الواحد

الواحد فرد مايقبل التقسيم
بس آنه أنقسم وبدونك أتعدد



اتقسم بدونك وانجمع وياك
لان كلك وي كلك بيك يتوحد



جنت جاهل وأجيك اتشرد من الناس
وهسة تعلمت من نفسي أتشرد



عشكتك ذرة ذرة وصرت أغار عليك
أذا محد يبوسك أذبح المحد



ولك لاتنطرح يم ناس تعبانين
موطولك حصار شلون تتمدد



شعرك ليلة ظلمة توحشت عالريح
كلما هب عليه تلملمة بأسود



جفنينك سمة ومجفي على رمشك ليل
وأذا ترمش يظل فرقد يطك فرقد



وفراشة نور أذنك والزلف خطاف
مرة يحط عليه ومرة يتبعد



يل عينك بحيرة بكل هدوء الليل
ودموعك نوارس لومشت عالخد



شفتينك شمس من تبتسم نصين
يكطعها البرق وبنصها يتجمد



وعلة خدودك صور منقوشة من بوسات
أباوع بالصور مابايسك أحد



وحنجك صدر بجعة أنصاغت من النور
أذا ماتت شمس من نور تتولد



ومثل مرمر ركبتك نص ذهب نص جام
وعيني الماي هاي العصدر تركد



وانام بباب صدرك واذنب وانخاك
كبتين الذهب ماتشفع لأحد



يبو أيد الثلج لاتطلع بتموز
مو خاف الثلج خاف الخلك تبرد



وأذا لاموثلج كل هالبياض منين
معقولة العظم فوق الجلد يصعد



يبو ساك الكطن ليش فتحتلك باب
موخاف الكطن بالعين يتفرهد



خطواتك حضارة وخصرك التاريخ
وأذا تمشي العرب فوق الفرس تصعد



علي كلما تمر يجبرني حسن البيك
أوصفنك لجن من وصفك أتردد



لذلك ماوصفتك وأعتذر يهواي
وصفت الخيال المنك تولد